كِلّ هالشـّي صار لأَنكُن حَمَّلتُونا مَسؤُولِيِّة كبِيرة من خِلال مُتابَعِتكُن، واِهتِمامكُن بِ برنامِج جيل الإنجيل ومُشارَكِتكُن.
مسابقة جيل الإنجيل لون من ألوان التّسلية الرُّوحيِّة… مُوَجَّها لَ كِل مَسِيحي... نعَمَلِت تَ تنَشِّط الذّاكرَة، وتكُون منافَسِة فِكرِيِّة ورُوحيِّة وبيبليِّة ومَرَّات ثَقافِيِّة.
لَيش جِيل الإنجِيل App"؟ تَ تِختِبرو مَعلومَاتكُن وِتعيشو مغامَرة بيبليِّة، وِتسافرو بين الفصُول والآيَات والمَعلُومَات العامِّة الرُّوحِيِّة، بِ جَوّ من المنافَـسة الرُّوحِيِّة المُحَبَّبة لَ قلُوبكُن وين مَ كِنتو؟
حَبّينا تكون هال Mobile App أوَّل مسابَقة بيبليّة مَسيحيِّة بِ اللِّغا العَرَبيِّة على أجهِزِتكُن الذَّكِيّة.
أَسئلِتنَا مِش بَس من الكتَاب المقدّس، مسابَقِتنا مُمكِن تضَوِّي عَ مفاصِل من حَياة الكنِيسِة وتارِيخَا، وعَ حيَاة بَعض القِدِّيسِين، والعَقِيدة واللاَّهُوت، والسِّنِة الطَّقسيَّة، ومعلُومَات عامِّة وغَيرا..
"جيل الإنجيل" فيكُن تتَابعُوه من وَرا شاشة Teleumiere/Noursat (من أيلول لَ حزيران) وكمان صَار فِيكُن من الMobile لّي بين إيدَيكُن، وساعِة لّي بَدّكُن، تكُونو لاعِبين أو مُنافِسين عَنيدين، ومين بيَعرِف يِمكِن تِقطفو جوايز مهِمِّة.
برنامج جيل الاِنجيل بَلَّش رِحلتو من فَترا بِ بِستان الرَّب واليوم حابِب يقِلّكُن: يا شبيبة الألفِيِّة التّالتة، كِل شي بْ هالدِّني قَشّ... ما تِنسو تكونو من "حِرّاس الفَجر". جيل الإنجيل بَلَّش بِرنَامج تلفزيوني، صار كُتُب، وِاليَوم صار بين إيدَيكُن App.
قَوُّو قلُوبكُن...